ગયા વર્ષે ભારત અને ચીનના સૈનિકો વચ્ચે ગલવાન ખીણમાં થયેલા લોહિયાળ સંઘર્ષ અંગે ચીનની પોલ ખોલનારા એક બ્લોગર પર ચીનની કોમ્યુનિસ્ટ પાર્ટીએ આકરી કાર્યવાહી કરી છે. ચીને આ બ્લોગરને જેલમાં પૂરી દીધો છે. ઉલ્લેખનીય છે કે આ અથડામણમાં ચીનના કેટલા સૈનિકો માર્યા ગયા હતા તેનો સાચો આંકડો હજી સુધી જાણવા મળ્યો નથી. તાજેતરમાં ચીનના બ્લોગર ચાઉ જિમિંગે આ અથડામણમાં માર્યા ગયેલા સૈનિકોના મોતની સંખ્યા અંગે શંકા વ્યક્ત કરી હતી. એ પછી ચીને આ બ્લોગરને શહીદોનુ અપમાન કર્યુ હોવાના આરોપ બદલ દોષી ઠેરવ્યો છે. તેને આઠ મહિનાની જેલની સજા કરવામાં આવી છે. દરમિયાન ચીનની સરકારે બ્લોગરને આ નિવેદન બદલ 10 દિવસમાં માફી માંગવાનુ અલ્ટીમેટમ આપ્યુ હતુ. એ પછી નાનજિંગ પ્રાંતની પોલીસે તેની ધરપકડ કરી હતી. ધરપકડ બાદ જાહેર કરાયેલા વિડિયોમાં જિમિંગ માફી માંગતો નજરે પડયો હતો. જોકે કોર્ટે તેને આઠ મહિનાની સજા આપી છે.
