અનામતના વિરોધમાં દેશભરમાં સોશિયલ મીડિયા પર અફવા તરીકે ફેલાઈ ગયેલા મંગળવારના ભારત બંધની અસર કેટલાક રાજ્યોમાં પણ દેખાય રહી છે. ગુજરાતમાં તેની કોઈ અસર નથી જોવા મળી. જોકે, આખા દેશમાં તેની અસર જોવા મળી નથી. પરંતુ બિહારના કેટલાંક જિલ્લાઓમાંથી ભારત બંધ દરમ્યાન પ્રદર્શન અને આગચંપીના સમાચાર છે.મળેલ માહિતી અનુસાર, આરામાં રાજગીરથી દિલ્હી આવી રહેલ શ્રમજીવી એક્સપ્રેસને પ્રદર્શનકારીઓએ રોકી દીધી હતી. આ સિવાય બીજી કેટલીય જગ્યાએથી પણ ટ્રેનોને રોકવામાં આવી હતી. બિહારના આરામાં અનામત સમર્થક અને વિરોધીઓની વચ્ચે ઝપાઝપી પણ થઇ અને ફાયરિંગના સમાચાર પણ આવી રહ્યાં છે.અને ૬ થી ૭ પોલીસકર્મચારી ઘાયલ થયાના સમાચાર પણ મળ્યા છે. આ સિવાય આરા-બક્સર રોડ પર પણ પ્રદર્શનકારીઓએ રસ્તાઓ બંધ કરી વાહનોની અવરજવર ઠપ કરી દીધી છે. હિંસા બાદ આરામાં ૧૪૪ કલમ લાગૂ કરી દેવામાં આવી હતી.
અનામતના વિરોધમાં અપાયેલા ભારત બંધ કહેવાતા આ પ્રદર્શનમાં સામેલ કેટલાંક યુવકોના ગ્રૂપે બિહારના ભોજપુરમાં રસ્તો જામ કરી દીધો અને કેટલાંય સ્થળોએ આગચાંપીના સમાચાર પણ છે. આ સિવાય કૈમૂર જિલ્લામાં નેશનલ હાઇવે 219 પર પણ પ્રદર્શનકારી યુવકોએ અનામત વિરોધી સૂત્રોચ્ચાર કરતા નેશનલ હાઇવે જામ કરી દેવાયો. મુઝફ્ફરપુરમાં પટના હાઇવેને બ્લોક કર્યાના સમાચાર છે.
આ બધાની વચ્ચે ભારત બંધમાં હિંસાની આશંકાએ દરભંગાની લલિત નારાયણ મિશ્રા યુનિવર્સિટીમાં બીએની પરીક્ષાને રદ્દ કરી દેવાઇ છે. તદઉપરાંત યુપી, મધ્યપ્રદેશ, અને રાજસ્થાનના કેટલાંક શહેરોમાં શાંતિપૂર્ણ પ્રદર્શનના સમાચાર છે પરંતુ કયાંય ભારત બંધની કોઇ ખાસ અસર જોવા મળી નથી.
રાજસ્થાનના કેટલાક ભાગોમાં પણ આ કહેવાતા બંધની અસર જોવા મળી રહી છે. અનામતના વિરોધમાં રસ્તા પર ઉતરી આવેલા યુવાનોએ બાઈક રેલીઓ કાઢી હતી, અને કેટલીક જગ્યાએ બજારો પણ બંધ કરાવ્યા હતા.
યુપીના મથુરામાં બજાર બંધ છે જ્યારે મેરઠ, મુઝફ્ફરનગર, અને સહારનપુરમાં બંધની ખાસ અસર જોવા મળતી નથી.મધ્યપ્રદેશના ભિંડ, મુરૈના, અને ગ્વાલિયરમાં મોબાઇલ ઇન્ટરનેટને બંધ કરી દેવાયું છે. ભિંડ અને મુરૈનામાં કર્ફ્યુના લીધે બજાર બંધ છે. મધ્યપ્રદેશના ભોપાલ, રાજસ્થાનના જયપુર અને ભરતપુર અને ઉત્તરાખંડના નૈનીતાલમાં 144 કલમ લાગૂ કરાઇ છે.
ઉલ્લેખનીય છે કે કોર્ટે એકટમાં ફેરફાર કરતાં એસસી-એસટી એકટમાં તત્કાલ ધરપકડ કરવી ના જોઇએ. આ એકટના અંતર્ગત નોંધાતા કેસોમાં આગોતરા જામીન મળે. પોલીસે 7 દિવસમાં તપાસ કરવી જોઇએ. સરકારી અધિકારીની ધરપકડ અપોઇન્ટિંગ ઓથોરિટીની મંજૂરી વગર કરી શકાય નહીં. આ એકટમાં સુધારો કરતાં દેશભરના દલિતોમાં આક્રોશ ફાટી નીકળ્યો અને તેના વિરૂદ્ધમાં 2 એપ્રિલના રોજ ભારત બંધનું એલાન કર્યું હતું. તેમાં 12 રાજ્યોમાં સૌથી વધુ અસર જોવા મળી અને હિંસામાં 15 લોકોના મોત થયા હતા.
