દુનિયા એક બાજુ કોરોના મહામારી સામે લડી રહી છે. ત્યારે બીજી બાજુ બોલિવૂડથી એક પછી એક ખરાબ સમાચાર સામે આવી રહ્યા છે. બોલિવૂડના જાણીતા ડિરેક્ટર નિશિકાંત કામતનું નિધન થયું છે.
નિશિકાંત કામતની થોડા સમય પહેલા સ્થિતિ ગંભીર હતી. તેઓ હૈદરાબાદના Asian Institute of Gastroenterology હોસ્પિટલમાં દાખલ હતા. નિશિકાંતને ICUમાં રાખવામાં આવ્યા હતા અને તેમની સ્થિતિ ક્રિટિકલ હતી. પરંતુ હવે નિશિકાંત કામતે દુનિયાને અલવિદા કહ્યું છે. નિશિકાંતના નિધન પર બોલિવૂડના દિગ્ગજ અભિનેતા અજય દેવગને શોક વ્યક્ત કર્યો છે.
અજય દેવગને ટ્વીટ જાણકારી આપી હતી. અજય દેવગને નિશિકાંત કામતના ડાયરેક્શનમાં ફિલ્મ દ્રશ્યમમાં કામ કર્યું હતું. જો કે, આ પહેલાથી જ નિશિકાંત કામતના નિધનની ખબરો સોશિયલ મીડિયા પર વાયરલ થઈ હતી. જેના પછી અભિનેતા રિતેશ દેશમુખ અને ડિરેક્ટર મિલાપ ઝવેરીએ ટ્વીટ કરી જણાવ્યું હતું કે તે જીવિત છે અને તેમની હાલત ગંભીર છે. પરંતુ હવે તેમના નિધનના સમાચાર આવ્યા છે. આપને જણાવી દઈએ કે નિશિકાંત કામત એક સારા કલાકાર અને ઉમદા ડિરેક્ટર હતા. નિશિકાંતે જોન અબ્રાહમની ફિલ્મ ‘રોકી હેન્ડસમ’માં વિલનની ભૂમિકા ભજવી હતી. આ ઉપરાંત ભાવેશ જોશી: સુપરહીરોમાં અનિલ કપૂરના દીકરા હર્ષવર્ધન કપૂર સાથે પણ કામ કર્યું હતું.
